yogya putri

Tata Rias Pengantèn Kakung

Tatanan rikma pinangantèn kakung namung prasaja. Rikma dipunjamas, dipungaringaken, lajeng dipunrapikaken. Pinangantèn kakung ngagem kuluk kanigaran. Sadèrengipun dipun-agem, kuluk kanigaran menika sampun dipunjangkepi kalihan ukel tekuk alit, pethat alit, sarta satunggal mentul alit ingkang dipunpasang ing wingking.

Kajawi punika, pinangantèn kakung ugi ngagem aksesoris ingkang kawastanan sumping ing sanginggiling talingan. Pinangantèn kakung ngagem kain pradan, wondènè motifipun saged : sida mukti, sida luhur, nitik simbar lintang, parang kusuma, semèn rama, ganda suli utawi semèn raja. Wiyaring wiru antawis 3-4 cm. Rasukanipun ngagem rasukan sikepan bordiran, warninipun saged : abrit, ijem utawi biru. lonthong, kamus, lurep , kalihan selop ugi njangkepi busananing pinangantèn kakung. Aksesorising busana ingkang dipun-agem déning pinangantèn kakung inggih menika : karset (wujudipun kados kalung warninipun emas), bros, ali-ali saha dhuwung brangkah ingkang sampun dipunjangkepi reroncéning sekar sritaman.

Tata Rias Pengantèn Putri

Rikmanipun pinanganten putri ingkang sapisan dipunpethati tumuju wingking saéngga katingal rapi, lajeng ndamel sunggar. Sunggar inggih menika wujuding rikma ing sanginggiling talingan kiwa kalihan tengen. Salajengipun mendhet lungsèn ingkang awujud rikma, wiyaripun sajempol ingkang dipunpendhet saking uyeng-uyeng sawingkinging panunggul.

Lajeng masang cemara utawi rikma palsu. Sasampunipun cemara kapasang, lajeng damel ukel tekuk. Ing sisih kiwa kalihan tengenipun sanggul dipunpasangi roncèn usus-usus (usus-usus duk), salajengipun dipunpasang harnal supados kiyat. Wondènè ing sisih sanginggiling sanggul dipunpasangi pethat gunungan ingkang kapasang majeng wingking saha jejeg kalihan sanggulipun. Ing sangandhaping lungsèn satengahing sanggul dipunpasang ceplok ingkang arupi sekar mawar abrit. Ing sakiwa-tengening sanggul dipunpasang jebehan ingkang dipunpasang selaras kalihan wujuding sanggul. Warnaning jébéhan dipunjumbuhaken kalihan busananipun pinangantèn, boten kedah sami kalihan warnanipun busana, saged mawi warna menapa kemawon kejawi warna ijem kalihan pethak. Sasanesipun punika, sanggul ugi dipunrengga ngginakaken pelik. Pelik inggih 

punika hiasan kertas ingkang wujudipun lintang sekawan kelopak, cacahipun pelik antawisipun 9 dumugi 11 iji. Ing pungkasan, sanggul dipunpasangi menthul ageng cacahipun namung setunggal, dipunpasang majeng wingking jejeg ing antawisipun pethat gunungan kalihan mustaka.

Boten kados pinangantèn kakung, tata rias pasuryan pinangantèn putri langkung njlimet, langkung awrat malih. Caranipun ingkang sepisan, pasuryanipun pinangantèn putri dipunresiki ngginakaken pembersih, lajeng dipunwedhaki. Alisipun dipundamel selaras kalihan wujuding pasuryan. Lajeng pipinipun dipunsukani warna abrit sekedhik, makaten ugi lathinipun. Sasampunipun punika, ndamel cengkoronganing paès kados gambar menika. Cengkorongan paès wonten panunggul, panitis, pangapit, saha godhég. Sedaya punika dipunpolés ngginakaken pidhih kanthi rata, inggih menika ngginakaken welat saking ngandhap pinuju nginggil.

Pinangantèn putri ngagem kain prada kados dènè pinangantèn kakung, wondènè motifipun saged : sida mukti, sida luhur, nitik simbar lintang, parang kusuma, semèn rama, ganda suli utawi semèn raja. Wiyaring wiru antawisipun 2-2,5 cm. Rasukanipun ngagem kebaya beludru ingkang warninipun sami kalihan rasukanipun pinangantèn kakung. Pinangantèn putri ugi ngagem selop bordiran. Wondènè aksesoris ingkang dipun-agem déning pinangantèn putri inggih punika : kalung, bros, subang, gelang saha ali-ali.